النظافة من الايمان

في كل شوارع البلد, اكثر حاجة ممكن تشوفها هي اليفط, يفط دعائية , انتخابات, باعة جائلين يهنئون عضو الدائرة بخطوبه أخته, يافطه ( معاك يا ريس ) المشهورة, و ممكت تلاقي أبو عمار صاحب القهوة بيعلن عن خفض أسعار المشاريب.. و الملخص ان الشوارع تتحدث بلسان أهلها..ما علينا..
و لو لاحظت, فهناك دائما يافطة أخري مكتوب عليها النظافة من الايمان,
و ديه هتلاقيها متكررة كل 300 متر ولا حاجة في كل شارع, و ملايين الناس
بتشوفها كل يوم, و الغريبة بقي انك تلاقي تحت اليافطة مقلب زبالة, مربط
حصان او حمار, او ماسورة مجاري ضاربة..

ناس كتير اتكلمت في موضوع النظافة, و حملات لا تلقي المهملات علي الارض
تملا قنواتنا المحلية بل و مطبوعة علي كل منتج عليه ورقة, و أكيد و احنا
صغيرين في المدرسة سمعنا كثير من مدرسينا أن النظافة من الايمان و كان
عقاب المتأخرين عن الحصة الأولي هو جمع المهملات من حوش المدرسة.... والسؤال هو,
ازاي الشوارع زبالة رغم حملات التوعية الجبارة ديه؟؟
و الاجابة أن الأهم من التوعية الاعلامية, هو ثقافة بلدي الجميلة
النظيفة اللي لازم تكون عند المواطن, و ده مش هيتحقق الا باحساس المواطن
بالانتماء, و حاجات كتير انا مش عايز اتكلم عنها.



انما اللي انا عايز اتكلم عنه و اوضحه هو ان, انتوا ازاي عايزين الناس مترميش حاجة في الارض و مافيش سلة مهملات موجودة؟؟؟
يعني عايزين البني ادم يتحول لصفيحة زبالة متحركة؟

أنا عايز أحكي حكاية أختم بيها, و الحكاية هتوضح و تثبت أن الأهم من
التغطية الاعلامية هو السعي وراء خطه لتنظيف الشوارع من القمامة...
أتفقنا احنا فريق المجلة اننا مش هنرمي حاجة في الارض خالص تمهيدا لبدأ
حمله في المجلة لعدم القاء القمامة في الارض, و كان لازم طبعا نبتدي
بنفسنا, و الحمد لله بنحاول.
المهم, كنت راجع انا من الكلية بعد يوم طويل و قررت اني اكل حاجة قبل
ما أروح البيت و فعلا اشتريت ما اشتريت و باكل وانا ماشي, و الحمد لله
خلصت و استنيت لما أنزل من الميكروباص علشان احط ما تبقي مما أكلت في سله المهملات, وفعلا نزلت و قاعد أدور علي صفيحة زبالة اني الاقي؟؟!!,المهم
لاقيت واحدة بعيدة شوية و قررت اني اوصل لحد هناك مش مشكله, المهم رحت
هناك و رميت الورق و فاجأة لاقيت الورق اللي انا رميته موجود علي الارض, قلت يمكن انا ماشفتش و رميته برة, كررت الموضوع تاني, و نفس اللي حصل حصل, و اكتشفت في الاخر ان سله المهملات مفتوحة من تحت ؟!؟!؟!؟!؟!؟!؟!؟

كلمه والسلام: هو حد سرقها ولا العمال نسيوا يركبوا الجزء ده, ؟؟
بس خلاص