من فضلك ادخل وساعد علي قد متقدر محتجين لكل واحد اعمل خير

4 مليون مدمن في مصر.. أما المتعاطون فهم
أضعاف هذا العدد.. تلك كانت الإحصائيات المرعبة والتي كانت دافعا قويا لأن تضع أسرة
"بص وطل" يدها بيد الأستاذ عمرو خالد.. ملتمسين الهدى في قوله تعالى:
"وَتَعَاوَنُوا عَلَى الْبِرِّ وَالتَّقْوَى وَلَا تَعَاوَنُوا عَلَى الْإِثْمِ
وَالْعُدْوَانِ".. من أجل أن نساهم معا في حل هذه المشكلة وإن لم يكن بشكل كامل
فعلى الأقل نحدث تغييرا إيجابيا.. فضع يدك بأيدينا.. في حملة من نوع خاص.. حملة لا
تهدف إلى إبراز الجانب السلبي للإدمان فقط بقدر ما تعمل على أن تمد يديها لهذا
المدمن حتى توصله لبر الشفاء بإذن الله.. في الوقت الذي تقدم فيه نماذج حقيقية
وواقعية لأناس نجحوا في الخروج من دائرة الإدمان







بسم الله الرحمن الرحيم والحمد لله رب العالمين..
رسالة لكل أم في عيد الأم، كل سنة وأنتِ طيبة يا ست الحبايب وربنا يسعدك ويبارك
لك ويرضى عنك... أنا لو قعدت أقول من هنا للسنة الجاية إيه أحلى لقب وأعظم لقب في
تاريخ البشرية بعد كلمة أنبياء.. إيه أحلى لقب عِرفته البشرية؟.. دكتور، مهندس،
تاجر، زعيم، قائد، جنيرال، ولا "أم"؟، هل في لقب عِرفته البشرية أحلى من كلمة "أم"؟
هل في مشهد ربنا وصفه زي مشهد الأمومة..؟ أبدا.

قال تعالى: "وَأَوْحَيْنَا إِلَى أُمِّ مُوسَى أَنْ أَرْضِعِيهِ فَإِذَا
خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا
تَحْزَنِي.."

هل في حد ربنا طمِّنه على المستقبل زي ما طمِّئن
الأم..؟ ربنا قال للنبي صلى الله عليه وسلم على مستقبل الدعوة: "ليس لك من الأمر
شيء"..

لكن قال للأم: "إِنَّا رَادُّوهُ إِلَيْكِ
وَجَاعِلُوهُ مِنَ الْمُرْسَلِينَ" علشان قلبها ميتوجعش... قد كده الأم
غالية على ربنا.. قد كده غالية قوي قوي قوي..
وإذا كانت غالية على ربنا قد كده فالنبي علمنا إنها غالية.. "أمك ثم أمك ثم
أمك"... هو الراجل كان بيسأل وبيقول إيه؟ بيقول له: "يا رسول الله من أحق الناس
بحسن صحابتي.."، فقال له: "أمك"، هو الراجل بيسأل عن الصحاب أصاحب مين! قال له
"أمك".. يا رسول الله أصاحب مين؟، قال "أمك ثم أمك ثم أمك ثم أبوك"..
يعني يا ست الحبايب كل سنة وأنتِ طيبة، ربنا يسعدك ويحفظك، احنا بنعمل حملة
اسمها حملة "حماية" علشان نحمي أولادنا من المخدرات.. فيا كل أم ولادنا معرضين
-ابنك وابني وبنتك وبنتي- كلهم معرضين للمخدرات، بالله عليكِ يا كل أم احنا هنحتفل
بيكِ في عيد الأم..

بس علشان تفضلي سعيدة على طول..
_________________

إذا كنت عاوز أو عاوزة تعرفي إذا كان اختيارك لشريك
حياتك في محله ولا لأ، روح السوق!.. (معلش خدني على قد عقلي لحد الآخر).. روح السوق
واتفرج على الناس وهي بتشتري الخضار أو الفاكهة.. شوف ازاي الستات بيتفحصوا
الثمرة.. بيشوفوا اللون الأول.. بيشوفوها إذا كانت تالفة ولا لأ.. وبعدين بيقرروا
أخيرا يحطوها في كفة الميزان عشان تتوزن..

المشتري دايما بياخد باله جدا من التفاصيل عشان ما ياخدش منتج "مضروب" أو بايظ..
الست اللي كانت بتشتري من شوية عاوزة الأفضل ببساطة.. كل ده عشان اختيار شوية فاكهة
أو خضار، فمابالكم بقى باختيار شريك للعمر كله.. الموضوع هيكون أصعب، مش كده؟
في الحلقة دي هنكلمكم عن العيوب.. ومش أي عيوب.. لأ.. العيوب المدمرة اللي معاها
بتكون العلاقة مش متوازنة.. طبعا مفيش حد كامل، وكل واحد فينا فيه عيوب.. بس امتى
العيوب تكون قاتلة، وتأثر على العلاقة للأبد؟.. وهل يمكن أن يتقبل الواحد.. حبيب..
مدمن؟

***

هي: أنا عارفة إنه بيشرب، وبيعمل حاجات مش كويسة بس عندي أمل
إن حبي يغيره...
صاحبتها: يا بنتي ما إنتِ كنتِ بتقولي كده من شهر، ومفيش حاجة
اتغيرت...
هي: أنا قلقانة عليه قوي.
صاحبتها: بصراحة أنا مش عارفة إيه اللي
عاجبك فيه، ده بيكون معانا ولا كأنه معانا.. ده غير الصحبة اللي هو ملموم
عليها..
هي: أنا عارفة كل ده بس أعمل إيه، بحبه!
صاحبتها: قلبي مش مرتاح
للموضوع.. ازاي هتقدري ترتاحي مع واحد مش في كامل وعيه، وازاي هتقدري تعتمدي عليه
بعد كده؟
هي: .....
خلينا نكون صرحاء مع بعض.. العلاقة العاطفية مع شخص متورط مع أي مخدر، بتكون زي
اللعب بالنار.. النار اللي على الأرجح هتحرقك في أي وقت. مفيش أي طريقة لتبسيط
الكلام اللي فات ده للأسف، أما إن كنت إنت نفسك اللي مدمن على مخدر (وده اللي
هنتكلم عليه بعد شوية) يبقى لازم تعرف إن تصرفك ده مش بس بيؤذيك، لكن كمان بيؤذي
الناس اللي بيحبوك واللي إنت كمان بتحبهم.
ازاي ممكن الإدمان يؤثر على العلاقات
العاطفية؟
طبعا كلنا عارفين الأضرار الفسيولوجية أو الجسمانية المدمرة
اللي بيعرض المدمن نفسه ليها.. وازاي هو بيفقد السيطرة على جسمه تماما وبيخلي نفسه
تحت رحمة مادة غريبة داخلة علي أجهزته.. لكن اللي هنتكلم عنه هو الضرر النفسي اللي
بيتسبب فيه الإدمان..

المشكلة الأولى:


"أنا بحبها في.. في كل حالاتها.. السيجارة أو الاتنين اللي
بتشربهم مش بيسببوا لي أزمة"
لازم تعرف إنك لما بتحب شخص مدمن إنت في علاقة ثلاثية.. يعني فيها 3 أطراف مش
2.. إنت والشخص ده والمخدر.. في الواقع لما بتحب حد مدمن، المخدر بيكون زي "الضرة"
تمام، لإنه بياخد وقت الشخص ده، واهتمامه وبيسرق روحه كمان. وهتلاقي نفسك بتكره
المخدر كأنه منافس (من لحم ودم) ليك على قلب شريكك.

المشكلة الثانية:


"أصل الموضوع كله في إيدي.. دي هي كانت سيجارة واحدة.. أنا
لو عاوز أبطل، هابطل"
والنقطة التانية إنك لما تحب شخص مدمن، إنت بتحب "عبد" للخمر أو للمخدر، والوضع
مش بيختلف كتير لما يكون الشخص ده مدمن على القمار مثلا (كلها حاجات بتخرج عن سيطرة
الإنسان وبتقوده، بدل ما هو يقودها).
وفي العادة الناس اللي بتكون مدمنة لحاجة، بيكون صعب عليها الاعتراف بإنها
مدمنة.. بتلاقيهم بيقولوا حاجات زي دي:

"دي بس كانت سيجارة واحدة.."
"أصل الموضوع منتشر وكل
الناس بتعمل كده.."
"دي بس كانت مرة تفاريح عشان صحابي"، وهكذا..
وده ما يطلق عليه في علم النفس مرحلة الإنكار.. لإن الاعتراف بالإدمان في الغالب
بيعني الاعتراف بالعجز. والشعور اللي بيوصل للطرف التاني إن الأشخاص دي ما عندهاش
استعداد إنها تبطل، لإنها مش شايفة إن عندها مشكلة أساسا! فأي محاولة للإقناع بتبوء
بالفشل..

المشكلة الثالثة:

"ده بيكون تحت تأثير المخدر تماما.. ساعات كتير باحاول أتكلم
معاه، بالاقيه مش معايا، ومش حاسس بيَ.. بيكون خارج نطاق الخدمة!.. "
لما يكون الشخص اللي بتحبه مدمن على شيء معين، بيكون مش موجود معاك بكل مشاعره
وأحاسيسه، لإن الإدمان بيخدر مشاعر الإنسان (وده مش كلامي ده كلام العلماء)، وده
أصلا السبب الرئيسي اللي بيخلي الناس تشرب خمرة أو تتعاطى مخدر.. إنها مش عاوزة
تحس.. مش عاوزة تحس بالحاجات اللي بتؤلمها أو تضايقها عشان يكونوا في حالة أفضل..
والحالة الأفضل دي معناها للشخص المدمن إنه يكون مخدر.. مخدر قوي.. والاعتياد على
حالة "التتنيح" العاطفي دي، هتؤثر على العلاقة كتير، لإنها هتستمر معاه على
طول..

طب مين هو المدمن؟


الأفلام العربي بتصور لنا إن المدمن هو اللي بيتسحب وهو داخل البيت بيتطوح وش
الفجر.. أو هو اللي بيشبه "شريف منير" في "بكيزة وزغلول"، أو "أحمد زكي" في فيلم
"المدمن"، عينيه مدمعة وبتجيله نوبات هرش وجرب مفاجئ لما يجي معاد الجرعة.. لأ! مش
ده المدمن..
المدمن هو أي شخص بيحتاج للمادة المخدرة عشان يحس إنه كويس، وبيستخدمها بشكل
دوري.. حتى لو مرة في الأسبوع..

لو إنت بتحب شخص مدمن، جهز نفسك للتعامل مع التالي:

• سلوكيات غير متوقعة ومواقف غير ثابتة..
• نوبات غضب
وعنف..
• حالة دائمة من الاكتئاب..
• تخدير عاطفي ولا مبالاة..
• انعدام
المسئولية..
• خناقات ومشاجرات مستمرة..
• عدم الاستقرار العاطفي بخصوص
العلاقة..

والحل هو
التالي:
لو إنت لسه على
البر:


في بدايات العلاقة احرص على إنك تعرف كل العادات السيئة من الأول خالص، خصوصا
اللي ليها علاقة بأي نوع من أنواع الإدمان.. واوع تهون الأمر لما تعرفه. ما تعيدش
تفصيل قيمك ومبادئك عشان تناسب الطرف التاني: أو إنت ضد الخمر أو الحشيش أو الحاجات
المشابهة، خليك ثابت على موقفك.

لو إنت في علاقة وشاكك إن الطرف التاني

عنده مشكلة من النوعية دي:


الموضوع ده مالهوش حل سهل.. لازم زي ما بنقول نقطع عرق ونسيح دم.. هدد الطرف
الآخر بإنك هتقطع علاقتك بيه تماما لو المشكلة دي ما اتحلتش، وكون ثابت على موقفك
ده؛ الحب والتفاهم والطبطبة لوحدهم عمرهم ما بيساعدوا في علاج مشاكل الإدمان.. مفيش
حد بيكون تحت سيطرة المخدرات، وبيكون عنده "استعداد" إنه يبطل في لحظة وبمنتهى
البساطة.. لازم يكون فيه ضغط خارجي عشان يساعده في اتخاذ القرار ده وتطبيقه..

لو كنت إنت اللي بتواجه المشكلة:



لازم تستشير متخصص.. مراكز علاج الإدمان وإعادة التأهيل النفسي
للمدمنين أو اللي كانوا مدمنين مش بس موجودة في أمريكا.. لأ موجودة في مصر كمان زي
حملة "حماية" اللي بيقوم بها الداعية "عمرو خالد" اليومين دول.. لو عندك رغبة بجد
في أنك تبطل إدمان خش على موقع عمرو خالد.. www.amrkhaled.net وانضم لحملة
"حماية"..

ودلوقت
بقى..
هل ممكن ترتبط بإنسان مدمن؟
تعرف
حد عمل كده؟
وإيه كانت النتيجة؟

شاركنا في
خبراتك أو آرائك الشخصية،
اللي أكيد هنستفيد منها..

ادخل وساعد شبابنا بيروح ادام عنينا انصحه اعمل اي حاجه لاتقف مثل الصنم فعمل الخير وجاب والمساعده تحركوا لاقيود تربطكم ساعوا اخونكم الشباب في الله